Profilo autori

So' ll'acqua ca leva 'a sete e sciacqua sanghe malato. 
So' ll'acqua ca te bive quanno nun sì ancora nato. 
Pozzo essere sporca, appantanata: spisso so' 'nquinata.
So' chella ca scenne 'a cielo e addò nuote ll'estate. 
So' duttile, plasmabile e sempe mm'adatto: 
piglio tutt''e fforme: traso e gghiesco a dint''e bbuatte.
Lavo, te purifico e levo macchie 'e sudore.
Pulezze 'ndumente ca 'mprufummano 'e lavoro. 
Dinto 'e mmente criative addevento acqua surgiva.
So' fforte, putente trasparente e primmitiva.
Alluvione, esondazione mme fanno faticà. 
Songo talmente chiena ca me sento 'e 'nfraceta'!
Vulesse regnere sempe cundutture e cisterne.
Là mme 'nfezzasse e desse a bbere pe ll'eterno. 
'Nvece abboffo puzze addo' nun ce stà capienza:
'nfonno 'e  mmente povere e prive 'e cunuscenza.
'Nvece 'e dissetà chi tene sete e s'è assiccato,
votto acqua dint''e tterre ca stanne già annaqquate.
So' ssete 'e sapienza, pe chi tene 'na cuscienza:
però disseto pure chi tracanna onniputenza! 
L'acqua e' necessaria e 'nce ne vò overo tanta:
ma fosse assaje chiù bello, sì bevesseme tutte quante!