Profilo autori

Ll'anema mja arrassumiglja 'o mare:
 j' mme ce tuffo, facenne 'o palummaro. 
'Stu mare ca s'atturciglià pe dint'â ll'onne, 
apprimma accumpare comme a 'na tavola: 
po' và struppianne 'e ssponne. 
Quanno tengo dinto 'e mmariggiate, 
schiaffeo e votte cavece p'ê scoglie. 
'O cielo se fa niro, se 'ncupisce 
e tutto chello ca vede ll'arravoglie. 
Sott'â luna chiena abbrillo e mme sfezzeo, 
po' mme 'ncazzo e chello ca trovo 'o sbrunzuleo. 
Quanno mme votto dint'ô  ffuoco: 
s'appiccene 'ncielo 'e lumminarie.
Po' se studene comme venene e poco a ppoco:
se tegne 'e arcobalene tutta ll'aria.
'Nunn'o pozzo cuntrullà tutto 'stu mare, 
ca m'affonne e mme fa spisso tremma'.
S'agita, mme cazzea, se 'ntallea, m'accavalla 
e dint'â  spumma po' mme fà annaspa'.
Quanno so' felice e 'o mare é chiaro:
'ncopp'â spiaggia lasso cunchiglje e stelletelle. 
Se ne regnene sicchie chine 'e ffigljole, 
pe nne fa bracciale, ricchine e ccullanelle. 
'E notte quanno 'o mare se fa cupo e scuro, 
llà mme metto spisso assaje  paura.
Mme ne vaco 'ncerca 'e 'nu miraggio:
m'attacco a n'ancora, pe mme fà curaggio. 
Nun ô saccio cuntrullà tutto 'stu mare, 
ca se sfezzea a mme dà strattune e scosse. 
Ma 'nfino a quanno ll'anema mia vò sfrennesia':
j' continuo a 'mbarca' acqua e a scansa' fuosse.