Profilo autori

Tanto, ma overamente tantu, tantu tiempo fa,
'nce steva 'na vicchiarella 'mbruttita pe ll'età.
Naso a pippa, faccia secca e arrugnata,
scarpe tutte rotte e vestite stracciate.
Passava 'e gghiurnate a ccosere cazettielle:
vuleva scarfa' 'e piede d'ê nnennelle.
Sola sferruzzava dint'â 'na casa fatta e legno.
Aucielle e palummelle lle devene sustegno.
Tortore, pettirosse 'ncoppa 'o davanzale
beccavano 'o ppane c'â vecchia sbriciulava.
Ma 'nu triste Natale, che malincunia,
'nce fuje p'ô paese 'na brutta caristia.
Manco 'na caramella, 'nu pezzullo 'e turrone.
Sulo famme, miseria e niente 'e bbuono.
Comme se dannava 'a povera befana
mentre cuseva 'e ccazzettielle 'e lana!
Ll'aucielle dispiaciute, se riunettene a cunsiglio:
quanno uno e lloro pronto, 'na decisiona piglia.
Pensajene 'e scetà 'a fatina primmavera:
nunn'era 'o tiempo suojo, pecchè essa durmeva.
Ma tanto fuje 'o rummore ca 'a figljola se scetaje.
Capette ll'esigenza e assunnata cunsigliaje:
"Ogneduno 'e vuje, vicino 'a ogni scupella,
adda mettere 'na bbella piumma 'e scella."
"Si facite ambresso e quanno sarrà o tiempo,"
"dinto 'e ccazette 'nun ammancarrà niente."
'A voce d'â fata accussì ghiette parlanne,
'a befana pe n'attimo, perdette 'o cumanno.
:"Va a purtà rjale, ciucculate e caramelle
a tutte 'e ccriature, pe dinto 'e ccasarelle..."
'A vecchia scagnanno 'a scopa pe cavallo, 
se mmettette a vula' cu 'o sacco 'ncopp'ê sspalle.
Ll'uocchie ll'addeventajene 'e lacreme chine,
mentre pensava 'e ffacce felice d'ê bammine.
Ancora mò, ma sulo pe 'na vota a ll'anno,
ciucculate e caramelle, essa và purtanne.
Dint'â casarella fà ancora 'e ccazette 'e lana,
però 'o seje e Gennaio, se mette a fa 'a bbefana!