Profilo autori

Che tristezza 'stu mandulino ca 'nun vene sunato. 
È 'nu strumiento viecchio ca sape 'e antiquato. 
Se ne sta sulo e annascuso 'nfunno a n'angulillo,

nun tenenne pretese se fa astritto e piccerillo. 
Arricurdannese d'â museca e d'e ccanzuncelle, 
se sona senza corde, cante antiche e riturnelle.

'Nun tene cchiù culore, 'o llegno s'è annerito
Se guarda attuorno stanco e pare privo 'e vita. 
Ogni tanto quaccheduno s'ô guarda strallunato,

se ll'aggira, se ll'avota e po' 'o lassa llà appujato. 
Ma chella forma tonna e chillu suono chino, 
n'hanno fatto sunnà 'e viecchie core malandrine!

Quanta suspire, applause e pure tanta siscate, 
addereto a 'stu strumiento ca sape 'e passato. 
Duje ragnetielle amante vanno a ammuriggià,

sotto a 'nu nido 'e povere ca stà appujato llà.
N'anema nobile ce passa 'a coppa 'nu piumino,
isso cuntinua a sunà 'nu triste canto mandulino.